Martín Camiña ILUSIONISTA
Premio Nacional de Maxia - Donostia
Premio Congreso Almussafes - València
Premio Asoc. Portuguesa de Ilusionismo - Algarve
DIRECCIÓN MÁXICA " I N V E N T I O "
A Maga Fani
"J, K, W e Y": UNHA ESCOLMA DE DESPROÓSITOS (Maxia con prebe de lingua)
Un espectáculo con mollo de antoloxía da actualidade lingüística: máxico e poético, unha desfeita etnográfica, unha escolla de ilusionismo, humor, participación e un abandono total da nosa historia.
MAXIA de ESCOITAR
A arte da transformación, por medio do ilusionismo, a música e a imprudencia escénica.
Maxia e acontecementos melódicos sen siso, desexan desacougar felizmente a nosa comodidade,
IGUALDADE: onde estás ?
Espectáculo cheo de ilusións, moito humor e participación do público, para tentar expor non só as desigualdades cotiás e históricas, senón tamén a importancia de erradicalas traballando non ámbitos da educación e a cultura.
ALTA VOLTAXE de ILUSIÓNS
Benvid@s a unha fartura de sorrisos dentro dunha esmorga de ilusionismo, co obxectivo de amosar uns divertimentos anómalos e mesmo, case, milagreiros. Un espectáculo para ser ser ollado e ulido por concorrencia predisposta á alta voltaxe...de diversión.
IMPREVISTOS POUCO VISTOS
Dispón da testa para escaravellala, ollando coas orellas moi abertas o fantasioso e irreverente cosmos de desenferruxar queixadas ou exercitar o músculo viaxeiro que vai dende o astrágalo até o óso frontal.
En resumo, se desexas pasalo ben, lembra: “alá onde vaias...sempre estarás ti!”.
As AVENTURAS de 1 CÉLULA CHAMADA a TRIUNFAR
Historia, case real, dunha célula amiga....mais, non unha célula calquera: ¡unha que saíu do mar, foi de mudanza e triunfou!.
Membranas celulares, citoplasma e un feixe de gargalladas cun espectáculo para todo tipo de organismos: tanto eucariotas como procariotas.
MAXIA pola IGUALDADE
A nosa protagonista chega a casa despois dunha xornada longa de actividades.
Coma a todas as mulleres, o día non remata chegando ó fogar.
A "Igualdade" creará fantasías cá louza da cociña, vasoiras, roupas, nivelará o soldo para todas as persoas e rematará cunha exposición de forza física e mental: a mesma forza que durante décadas levan amosando as mulleres en prol dos seus dereitos fundamentais.
2 iLUSIONISTAS CUNHA MENCIÑA CONTRA O FASTÍO
Maxia incitadora ó esparexemento de labazadas contra o fastío, corrixindo a sintonización do presente, co pulo do ilusionismo como sinal emisora.
Unha laretada de maxias esperpénticas, con prebe de participación do público:
un intre de limpeza da ferruxe na articulación mandibular.
"ERIC PLANCTO" QUIXO SER GAITEIRO (Maxia con prebe de lingua)
Cando “Eric Plancto” resolve ser gaiteiro e falar coa fala de quen toca a gaita, sorpréndese das situacións a superar para acadala.
Porén, empeza unha viaxe de coñecemento, pescudando a verdadeira identidade da nosa terra.
Espectáculo de maxia, humor, defenda das nosas tradicións, música de gaita ao vivo en diferentes intres e participación do público.
En resumo, un espectáculo para estarmos fachendos@s do que somos.
MAR, Terra e Lingua (Maxia con prebe de lingua).
Unha romaría de lingua, maxia e risadas.
Unha escolla de feitizos nuns diálogos rebuldeiros para toda a audiencia, co fin de manifestar o bo facer do noso idioma, de visibilizar moitas das súas posibilidades, de animar á súa utilización para novos e novas falantes, de mudar pensamentos pretéritos e ideas preconcibidas relacionadas coa nosa cultura, sociedade etc.
CALDEIRADA de LINGUA (Maxia con prebe de lingua)
Espectáculo de ilusionismo-lingüístico, humor e participación do público, fervido a lume lento. Unha caldeirada máxica, na que esmorecerán os escuros agoiros para a nosa lingua, coa invocación do: “Conxuro da Caldeirada”.
Amais, contaremos coa axuda dos nosos alcumes e unha manchea de ingredientes para saborear unha cultura propia cunha lingua de seu.
ASOMBROS de RÚA
Un camión escenario "aparecerá" na praza da vila, e tanto el coma 200 cadeiras completarán o espazo escénico ao aire libre.
Un teatro móbil, con toda a produción técnica, cheo de asombros, ilusións, humor, participación do público etc., dará forma e esculpirá estes asombros de rúa...baixo as estrelas.
MAXIAS e LATRICADAS VARIAS (Maxia con prebe de lingua)
“Maxias e Latricadas Varias” é un espectáculo sobrenatural, cómico e lingüístico para pór en valor a nosa lingua, inspirado e influído nunha nova ollada dun dos actos máis imaxinativos e fantásticos da nosa cultura: o telexornal da T.V.G.
MAXIA para EMPRESAS
Conseguir que o seu produto sexa lembrado pola súa clientela é todo un
éxito de venta..
A maxia como forma publicitaria consegue enviar unha mensaxe ao longo
de moitos minutos ás mentes d@s espectador@s. Un recordo orixinal e máxico do seu produto é un pretexto para estimular o interese comercial pola súa empresa.
MAXIA de PRETO: "Non pode ser"
Maxia para grupos reducidos de xente, con elementos coma: naipes, moedas, billetes, gomas, dados etc.
A arte do imposible a moi pouca distancia. Diversos galardóns a nivel nacional, acreditan deste espectáculo: pequeno en tamaño pero grande en emoción.
MUSEOS: VISITAS MÁXICAS
As visitas máxicas guiadas transforman unha típica visita, nunha experiencia atractiva, concedéndolle un compoñente máxico e didáctico para sorprender.
Grazas ó/á guía-mag@, @s asistent@s percorrerán o camiño deseñado, atopándose con sorpresas nas salas, no vestíbulo, no mobiliario, na exposición etc.
FÓRA DE CARTAZ
TRANSFORMANDO O PRESENTE
Maxia, música, efectos sonoros e emocións visuais para alterar a actualidade.
Cordas, cadernos, asentos que cobran vida, sorpresas a dúo, humor, participación do público...e un baixo eléctrico, proxectan situacións fóra do común en Clave Fantástica.
CORCHEAS, SEMIFUSAS e ILUSIÓNS
UNHA OBRA MÁXICA e MUSICAL
Unha obra máxica, musical e teatral composta en "clave de fa": fabulosa, fascinante e fantástica.
Ilusións sonoras cás partituras, os micrófonos ou as cordas da guitarra. Espectáculo para escoitar, ver e asombrarse, con Álvaro Muras,
Julio Cuns, Bruno Couceiro, A Maga Fani e Martín Camiña.
A OUTRA REALIDADE
UN PERCORRIDO MÁXICO A TRAVÉS DA CIENCIA
Unha produción a través da ciencia, da historia e do humor, grazas ao Laboratorio Itinerante da Outra Realidade.
Mag@s que pensaron en imposibles, coma Leonardo Da Vinci, Marie Curie, Arquímedes, Einstein ou Newton, estarán presentes no espectáculo....xunto a Xoque Carbajal, Marta Quintana, A Maga Fani e Martín Camiña.
